Rosilde Bertolotti
Li candareri

Chista no poi ciamalla pruzissioni
acchì è una passiggiadda in alligria
finz’a la gesgia di Santa Maria.

Zerthu chi è lu più megliu appuntamentu
e un gran riciamu pà li furistheri
chi accùdini a vidé li Candareri.

Già so un ammacchiu! Farani pumposi
da Pianu di Castheddu. Lu tamburu
e lu piffaru sona a duru a duru.

Farani dretti in Piazza e dugna tantu
si pònini a baddà. Ti pari nudda!
A fallu vi vò genti assai fuzzudda!

Farani fattu fattu a li banderi
li Gremi antighi. Canta dignidai
in chisthi soz di li faculthai!

Omini di prufettu, intelligenti:
massai, frabbigamuru, zappadori…
e a la chiza ti parini signori.

Cara Sassari mea, di Ferraosthu
sei tu chi fari bedda e tirintina.
Li Candareri so la to’ vidrina.

Chi ipitàccuru raru! Eu l’aggiu in cori
e dugn’annu mi pari sempri nobu.
Parghu ridendi… cantu mi commobu!




(tratto da: Rosilde Bertolotti, Lassami fabiddà, Sassari, Edizioni Poddighe, s. d., pp. 233-234).


< indietro