La Festha Manna

È isciddendi li sonni luntani
lu tamburu drentu l'ammenti,
so arrugliendi li cori e li mani
li sassaresi tutti cuntenti...

Li pulthadori so tutti girendi
e ri pizzinni so puru brinchendi.

Li candareri lu zeru tucchendi
so cumenti l'innamuraddi,
tutti lizzeri abà so farendi
da la jenti incurunaddi.

E lu Sindagu s'è appinsendi...
E lu Sindagu s'è appinsendi...

E abà la Faraddha ripira manna
e li vetti a lu ventu di l'alligria:
l'ari so di la vidda, di la puisìa,
l'ari sempri firizi di la mè ziddai…

Pari un viaggi pribu di pinsamenti,
l'occi so tutti pieni di sintimenti
e puru l'aria è tirintina
candu li piffaru sona dall'anima,
sona di bonumori.

Canti pizzinni cumente pizzoni
so tucchendi lu Paradisu.
Pari giugghendi umpari a li fori
chistha Festha cu lu surrisu.

E cu l'agniru di l'emozioni
chistha piazza ha dugna curori.
Li sassaresi vi so tutti canti,
finza chissi più luntani.
Cuntinentari vi sò dugna palti,
vi so puru li brasiliani.

E lu Sindagu s'è trimmurendi...
E lu Sindagu s'è trimmurendi...




< indietro