Cesarino Mastino
Mezzaosthu

È turraddu mezzaosthu
impari a li candareri:
li parai i li carreri,
cu’ lu giubbettinu costhu

e li pantaroni niéddi,
so’ pulthendi la bandera
a la géisgia. Finz’a sera
drent’a chiss’isthrintaréddi

passani li pruzissioni,
e li rulli di tamburi
suddrunèggiani li muri…
Mezzaosthu, chi passioni!

Canti cosi chi ni bogghi
da lu cori: l’alligria,
l’anni di la pizzinnia;
e mi fai turrà a li logghi

undi so’ li cosi cari,
a li Monzi Cappuzzini,
a la Conza e a li Gialdhini…
candu veni tu mi pari

d’assé torra piccinneddu,
acciaraddu a lu balchoni,
i lu muru di Ruseddu:

Veggu tutta la me’ jenti
turrendi da Santu Preddu
e intendu lu fabéddu
chi cunsóra… canti ammenti

Hai lassaddu i lu me’ cori!
È passaddu Mezzaosthu
e l’atugnu è già accosthu;
una fiamma móri móri

badda drent’a li lampioni;
mamma azzendi li canderi
e appronta lu brasgeri,
so’ finiddi li canzoni!




(tratto da: Cesarino Mastino, Tutta Sassari, Sassari, Chiarella, 1968, pp. 82-83).


< indietro