Cesarino Mastino
Li Parai

Figiuraddìri cantu so’ ariganti
visthuddi comu tanti prinzipini,
cu’ li cazzetti niéddi e l’ipadini!
A mezzaosthu pósthani li guanti

e la camisgia ricamadda in fini
cu’ li buttoni d’oru e li brillanti.
Passani li trapperi e li viandanti,
li cazzuraggi, tutti tirintini,

li masthrudascia e li cunzadori;
e affacc’a li massai cu’ la bandera
lu sindagu in iscèipa tricurori.

Cant’è ciambadda abà la me’ ziddai:
carreri nóbi, genti furisthera,
grattazeri, automobiri, tramvai…

Ma gandu fàrani li so’ parai
Sassari torr’assé chissa ghi éra,
ed è pa ghissu chi no mori mai!




(tratto da: Cesarino Mastino, Tutta Sassari, Sassari, Chiarella, 1968, p. 34).


< indietro