Salvator Ruju
Li candaréri

Dindòndàn… Dindòndàn… Santamaria

Accòlli! Da Pïanu di Casthéddu
farèndi so abà li Candaréri,
cun tanti bètti di dugna curòri,
l’ipighi mann, li bandéri d’òru.

Lu pìffar’è sunèndi e lu tamburu.
Li Candaréri so baddarïani.
Tòo… tòrototòo… e tiu tii…
Canta gènti in Piazza, canta gènti!
Cument’un riu cand’è farada l’unda.
I li puggióri so abbudrunadi.
Fitti fitti i la bòcca di l’isthrinti.
Li Candaréri di li bèddi tinti
si fèimani addananz’à la Ziddài
a sarudà lu Sindagu e la Giunta.
La mùsiga di Cànepa è sunèndi.
Li Candaréri so baddarïani.
E tò… tòrotoròo… e tiu tii…
A unu a unu pàssani baddèndi.
Lu sindagu e la Giunta a dall’anòri
zi l’accumpagnarani finz’a géisgia.
In Corsu Vicu, la gintòria, un mari.
Canta n’è giunta da tutti li biddi,
da tanti lóghi di lu Cuntinenti!
E li custhumi pàrini fiòri.
S’azzendini li luzi a carasòri.
Finza lu zéru è tuttu ros’e òru.
I li balchoni una dilizia manna
di bandéréddi, di tappèti antighi.
Ma la più bèdda còsa, li baggiani
di cara bruna, d’ócci risurani.
Dindòndàn… Dindòndàn… E cussì sia:

Un benvinudu a tutti, un benvinudu -
dizini ribicchèndi li campani
mann’e minòri di Santamaria.

E i lu patiu, fattu a lu sarudu,
lu prim’a intr’à in géisgia è lu massaiu
cu li più bèdd’ipighi di lu trigu,
lu sègnu antigu e lu sègnu d’abà
chi Sàssasi è ziddai zappadorìna.
E fattu fattu l’althri cu li Grémi
par’arriggissi cun dibuziòni
addananzi a lu léttu di l’Assunta.
Li Candaréri abà so assintadi.
Dindòndàn… Dindòndàn… E cussì sia!
Li trè campani di Santamaria.





(tratto da: Salvator Ruju, Sassari veccia e noba, Sassari, Edizioni Gallizzi, 1978, pp. 107-108).


< indietro